א לַמְנַצֵּ֗חַ מִזְמ֥וֹר לְדָוִֽד׃
ב שְׁמַע־אֱלֹהִ֣ים קוֹלִ֣י בְשִׂיחִ֑י    מִפַּ֥חַד א֝וֹיֵ֗ב תִּצֹּ֥ר חַיָּֽי׃
ג תַּ֭סְתִּירֵנִי מִסּ֣וֹד מְרֵעִ֑ים    מֵֽ֝רִגְשַׁ֗ת פֹּ֣עֲלֵי אָֽוֶן׃
ד אֲשֶׁ֤ר שָֽׁנְנ֣וּ כַחֶ֣רֶב לְשׁוֹנָ֑ם    דָּֽרְכ֥וּ חִ֝צָּ֗ם דָּבָ֥ר מָֽר׃
ה לִירֹ֣ת בַּמִּסְתָּרִ֣ים תָּ֑ם    פִּתְאֹ֥ם יֹ֝רֻ֗הוּ וְלֹ֣א יִירָֽאוּ׃
ו יְחַזְּקוּ־לָ֨מוֹ ׀ דָּ֘בָ֤ר רָ֗ע    יְֽ֭סַפְּרוּ לִטְמ֣וֹן מֽוֹקְשִׁ֑ים
אָֽ֝מְר֗וּ    מִ֣י יִרְאֶה־לָּֽמוֹ׃
ז יַ֥חְפְּֽשׂוּ עוֹלֹ֗ת    תַּ֭מְנוּ חֵ֣פֶשׂ מְחֻפָּ֑שׂ
וְקֶ֥רֶב אִ֝֗ישׁ    וְלֵ֣ב עָמֹֽק׃
ח וַיֹּרֵ֗ם אֱלֹ֫הִ֥ים    חֵ֥ץ פִּתְא֑וֹם הָ֝י֗וּ מַכּוֹתָֽם׃
ט וַיַּכְשִׁיל֣וּהוּ עָלֵ֣ימוֹ לְשׁוֹנָ֑ם    יִ֝תְנֹֽדְד֗וּ כָּל־רֹ֥אֵה בָֽם׃
י וַיִּֽירְא֗וּ כָּל־אָ֫דָ֥ם    וַ֭יַּגִּידוּ פֹּ֥עַל אֱלֹהִ֗ים וּֽמַעֲשֵׂ֥הוּ הִשְׂכִּֽילוּ׃
יא יִשְׂמַ֬ח צַדִּ֣יק בַּֽ֭יהוָה וְחָ֣סָה ב֑וֹ    וְ֝יִתְהַֽלְל֗וּ כָּל־יִשְׁרֵי־לֵֽב׃