א-ב לַ֝מְנַצֵּ֗חַ לְדָוִ֥ד לְהַזְכִּֽיר׃    אֱלֹהִ֥ים לְהַצִּילֵ֑נִי יְ֝הוָ֗ה לְעֶזְרָ֥תִי חֽוּשָׁה׃
ג יֵבֹ֣שׁוּ וְיַחְפְּרוּ֮ מְבַקְשֵׁ֪י נַ֫פְשִׁ֥י    יִסֹּ֣גוּ אָ֭חוֹר וְיִכָּֽלְמ֑וּ חֲ֝פֵצֵ֗י רָֽעָתִֽי׃
ד יָ֭שׁוּבוּ עַל־עֵ֣קֶב בָּשְׁתָּ֑ם    הָ֝אֹֽמְרִ֗ים הֶ֘אָ֥ח ׀ הֶאָֽח׃
ה יָ֘שִׂ֤ישׂוּ וְיִשְׂמְח֨וּ ׀ בְּךָ֗    כָּֽל־מְבַ֫קְשֶׁ֥יךָ
וְיֹֽאמְר֣וּ תָ֭מִיד יִגְדַּ֣ל אֱלֹהִ֑ים    אֹֽ֝הֲבֵ֗י יְשֽׁוּעָתֶֽךָ׃
ו וַֽאֲנִ֤י ׀ עָנִ֣י וְאֶבְיוֹן֮    אֱלֹהִ֪ים חֽוּשָׁ֫ה לִּ֥י
עֶזְרִ֣י וּמְפַלְטִ֣י אַ֑תָּה    יְ֝הוָ֗ה אַל־תְּאַחַֽר׃