א לַ֭מְנַצֵּחַ לְדָוִ֣ד מִזְמ֑וֹר
יְהוָ֥ה חֲ֝קַרְתַּ֗נִי    וַתֵּדָֽע׃
ב אַתָּ֣ה יָ֭דַעְתָּ שִׁבְתִּ֣י וְקוּמִ֑י    בַּ֥נְתָּה לְ֝רֵעִ֗י מֵֽרָחֽוֹק׃
ג אָרְחִ֣י וְרִבְעִ֣י זֵרִ֑יתָ    וְֽכָל־דְּרָכַ֥י הִסְכַּֽנְתָּה׃
ד כִּ֤י אֵ֣ין מִ֭לָּה בִּלְשׁוֹנִ֑י    הֵ֥ן יְ֝הוָ֗ה יָדַ֥עְתָּ כֻלָּֽהּ׃
ה אָח֣וֹר וָקֶ֣דֶם צַרְתָּ֑נִי    וַתָּ֖שֶׁת עָלַ֣י כַּפֶּֽכָה׃
ו פלאיה פְּלִ֣יאָֽה דַ֣עַת מִמֶּ֑נִּי    נִ֝שְׂגְּבָ֗ה לֹא־א֥וּכַֽל לָֽהּ׃
ז אָ֭נָ֥ה אֵלֵ֣ךְ מֵֽרוּחֶ֑ךָ    וְ֝אָ֗נָה מִפָּנֶ֥יךָ אֶבְרָֽח׃
ח אִם־אֶסַּ֣ק שָׁ֭מַיִם שָׁ֣ם אָ֑תָּה    וְאַצִּ֖יעָה שְּׁא֣וֹל הִנֶּֽךָּ׃
ט אֶשָּׂ֥א כַנְפֵי־שָׁ֑חַר    אֶ֝שְׁכְּנָ֗ה בְּאַֽחֲרִ֥ית יָֽם׃
י גַּם־שָׁ֭ם יָֽדְךָ֣ תַנְחֵ֑נִי    וְֽתֹאחֲזֵ֥נִי יְמִינֶֽךָ׃
יא וָֽ֭אֹמַר אַךְ־חֹ֣שֶׁךְ יְשׁוּפֵ֑נִי    וְ֝לַ֗יְלָה א֣וֹר בַּֽעֲדֵֽנִי׃
יב גַּם־חֹשֶׁךְ֮    לֹֽא־יַחְשִׁ֪יךְ מִ֫מֶּ֥ךָּ
וְ֭לַיְלָה כַּיּ֣וֹם יָאִ֑יר    כַּֽ֝חֲשֵׁיכָ֗ה כָּֽאוֹרָֽה׃
יג כִּֽי־אַ֭תָּה קָנִ֣יתָ כִלְיֹתָ֑י    תְּ֝סֻכֵּ֗נִי בְּבֶ֣טֶן אִמִּֽי׃
יד אֽוֹדְךָ֗    עַ֤ל כִּ֥י נֽוֹרָא֗וֹת נִ֫פְלֵ֥יתִי
נִפְלָאִ֥ים מַֽעֲשֶׂ֑יךָ    וְ֝נַפְשִׁ֗י יֹדַ֥עַת מְאֹֽד׃
טו לֹֽא־נִכְחַ֥ד עָצְמִ֗י    מִ֫מֶּ֥ךָּ
אֲשֶׁר־עֻשֵּׂ֥יתִי בַסֵּ֑תֶר    רֻ֝קַּ֗מְתִּי בְּֽתַחְתִּיּ֥וֹת אָֽרֶץ׃
טז גָּלְמִ֤י ׀ רָ֘א֤וּ עֵינֶ֗יךָ    וְעַֽל־סִפְרְךָ֮ כֻּלָּ֪ם יִכָּ֫תֵ֥בוּ
יָמִ֥ים יֻצָּ֑רוּ    ולא וְל֖וֹ אֶחָ֣ד בָּהֶֽם׃
יז וְלִ֗י מַה־יָּֽקְר֣וּ רֵעֶ֣יךָ אֵ֑ל    מֶ֥ה עָֽ֝צְמ֗וּ רָֽאשֵׁיהֶֽם׃
יח אֶ֭סְפְּרֵם מֵח֣וֹל יִרְבּ֑וּן    הֱ֝קִיצֹ֗תִי וְעוֹדִ֥י עִמָּֽךְ׃
יט אִם־תִּקְטֹ֖ל אֱל֥וֹהַּ ׀ רָשָׁ֑ע    וְאַנְשֵׁ֥י דָ֝מִ֗ים ס֣וּרוּ מֶֽנִּי׃
כ אֲשֶׁ֣ר יֹֽ֭מְרוּךָ לִמְזִמָּ֑ה    נָשׂוּ֖א לַשָּׁ֣וְא עָרֶֽיךָ׃
כא הֲלֽוֹא־מְשַׂנְאֶ֖יךָ יְהוָ֥ה ׀ אֶשְׂנָ֑א    וּ֝בִתְקֽוֹמְמֶ֗יךָ אֶתְקוֹטָֽט׃
כב תַּכְלִ֣ית שִׂנְאָ֣ה שְׂנֵאתִ֑ים    לְ֝אֽוֹיְבִ֗ים הָ֣יוּ לִֽי׃
כג חָקְרֵ֣נִי אֵ֭ל וְדַ֣ע לְבָבִ֑י    בְּ֝חָנֵ֗נִי וְדַ֣ע שַׂרְעַפָּֽי׃
כד וּרְאֵ֗ה אִם־דֶּֽרֶךְ־עֹ֥צֶב בִּ֑י    וּ֝נְחֵ֗נִי בְּדֶ֣רֶךְ עוֹלָֽם׃